Liaba Leander

Du häsch so viel Menscha berüahrt, zum lacha brocht und gholfa wo immer Hilf brucht worda isch. Du wirsch üs allna fähla und a riesa Loch zrock loh. Es isch fasch ned zum erträga, doch du wirsch nia vergessa werda und häsch bi üs allna an Platz i üserna Herza. Zum Abschied möchten dir a paar vo üserna Mitglieder noch a paar Zeila widma.

«Met dira ufgstellta, lustiga und hilfsbereite Art wörsch du mir immer i Erinnerig blieba. Dini Persönlichkeit hät mir grossa Idruck gmacht und hät mi für mis Läba prägt. Du hesch mir di nötiga Schauspieltipps für üseri Schwertkampfszena im Film „Der Liechtenstein“ könna geh, es isch so a cooli Erfahrig gse und für es bini dir sehr dankbar. (Celina)»

«Du bisch immer mega liab gse und häsch di immer gern mit üs Kinder abgeh. Du häsch a luschtige und grosszügige Persönlichkeit ka und häsch immer mit üs Witzle gmacht und üs zum lacha brocht. Danke für alles. (Angelina)»

«I ha immer viel vo dir lerna könna während am Filmdreh. Wenn mir fertig gsi sind mit da Nerva, bisch du mit amna loschtiga Sproch koh und häsch üs wieder ufbaut. Din Humor und dini liabevolle Art würd mir fähla. (Justine)»

«Dr Schauspielunterricht mit dir isch immer loschtig gse und mir henn so viel vo dir lerna könna. Du bisch ned nur mit Spass und Herz sondern oh mit Wärme und Begeistrig dabei gse und häsch üs immer weder motiviera könna. Dafür simmer dir für immer dankbar. (Michelle und Alina)»

«An üseri gemeinsama Szena im Film „Der Liechtenstein“ werd i immer gern zrock denka und i bi stolz und fühl mi geehrt, dass i di kenna und met dir Schauspelera ha dörfa. Danke viel mol für alles was du für üs gmacht häsch. (Allegra)»

Danke für dini Träum, für dini liab Art und Danke für dies grosse Engagement. Danke für alles was du für d YOUNG STARS und oh sus für alle gmacht häsch. Du häsch a grosses Herz ka und mir werden die nia vergessa. Du fählsch.

Dini YOUNG STARS